មាត្រា ៨២._ ការបង្កើត និងលក្ខន្ដិកៈ

 

ផ្នែកទី ២

នីតិបុគ្គលសាជីវកម្ម

កថាភាគទី ១

នីតិបុគ្គលសាជីវកម្មទទួលខុសត្រូវមានកម្រិត

មាត្រា ៨២._ ការបង្កើត និងលក្ខន្ដិកៈ

១-ដើម្បីបង្កើតនីតិបុគ្គលសាជីវកម្មទទួលខុសត្រូវមានកម្រិត បុគ្គលដែលមានបំណងធ្វើជាសមាជិកត្រូវសហការ​គ្នាបង្កើតលក្ខន្ដិកៈ ហើយចុះហត្ថលេខារៀងៗខ្លួន។

២-លក្ខន្ដិកៈដែលបានកំណត់នៅក្នុងកថាខណ្ឌទី១ ខាងលើនេះ ត្រូវសរសេរនូវគ្រប់ចំណុចដូចខាងក្រោម ៖

ក-គោលបំណង ។

ខ-នាមករណ៍ ។

គ-ទីតាំងនៃទីស្នាក់ការកណ្ដាល ។

ឃ-បញ្ញត្ដិស្ដីពីចំនួនទឹកប្រាក់សរុបនៃទ្រព្យសម្បត្ដិជាមូលដ្ឋានដែលត្រូវធានាក្នុងនាមជានីតិបុគ្គល និង ទ្រព្យធនសកម្ម។ ក្នុងករណីដែលមានវិភាគទានជាវត្ថុក្រៅពីប្រាក់ ត្រូវសរសេរនូវឈ្មោះឬ នាមករណ៍របស់បុគ្គលធ្វើវិភាគទានជាវត្ថុក្រៅពីប្រាក់ ឈ្មោះនិង តម្លៃនៃទ្រព្យសម្បត្ដិនោះ ឬ ក្នុងករណីដែលបុគ្គលណាម្នាក់បានសន្យាថានឹងធ្វើអនុប្បទានទ្រព្យសម្បត្ដិណាមួយក្រោយពីការបង្កើតនីតិបុគ្គល ត្រូវសរសេរនូវតម្លៃនៃទ្រព្យសម្បត្ដិនោះ និង ឈ្មោះឬ នាមករណ៍របស់អនុប្បទាយី ឬ ត្រូវសរសេរនូវចំនួនប្រាក់នៃសោហ៊ុយដែលចំណាយ ក្នុងការបង្កើតនីតិបុគ្គល ហើយដែលនីតិបុគ្គលត្រូវទទួលបន្ទុក ។

ង-ឆ្នាំអនុវត្ដកិច្ចការ។
ច-ចំណុចស្ដីពីអភិបាល អ្នកត្រួតពិនិត្យ និង អ្នកមានតួនាទីផ្សេងទៀត។

ឆ-បញ្ញត្ដិស្ដីពីការទទួល និង ការបាត់បង់សមាជិកភាព ។

ជ-ចំណុចស្ដីពីគណនេយ្យ ។

ឈ-ចំណុចស្ដីពីការរំលាយ ។

ញ-ចំណុចស្ដីពីការកែប្រែលក្ខន្ដិកៈ ។

ដ-វិធីផ្សព្វផ្សាយជាសាធារណៈ ។

៣-លក្ខន្ដិកៈពុំមានអានុភាពឡើយ បើពុំបានទទួលសេចក្ដីបញ្ជាក់ពីសារការីទេ។

៤-លក្ខន្ដិកៈត្រូវរក្សាទុកនៅទីស្នាក់ការកណ្ដាល និង ទីស្នាក់ការសាខា។